Azərbaycanlı xanəndə "Şərq təranələri"nin birinci mükafatını aldı

Azərbaycanlı xanəndə "Şərq təranələri"nin birinci mükafatını aldı
3957 dəfə oxunub
  • A-
  • A
  • A+

Səmərqənd şəhərində keçirilən “Şərq təranələri” XII Beynəlxalq Musiqi Festivalı başa çatıb.

Axşam.az xəbər verir ki, nüfuzlu musiqi bayramında dünyanın 75 ölkəsindən 340 ifaçı iştirak edib. UNESKO-nun Baş direktoru, xanım Odri Azule festivalın təntənəli bağlanış mərasimində laureatları təbrik edib, musiqiçilərə uğurlar arzulayıb. O deyib ki, mədəniyyətlər bir-birindən ayrı inkişaf edə bilməz.

Festivalın baş mükafatı - Qran-Prini Özbəkistan Dövlət Konservatoriyasının tələbəsi Mexriniqor Abduraşidova alıb.

Azərbaycandan gələn gənc xanəndə Pərviz Qasımov və Qırğız Respublikasının “Komuzçular” dueti birinci mükafata layiq görülüb. P.Qasımovu Əməkdar artist Malik Mansurov (tar), Elşən Mansurov (kamança) və Ramin Abdullayev (nağara) müşayiət ediblər.

İkinci mükafat Türkmənistan və Monqolustan nümayəndələrinə verilib. Üçüncü yeri isə Tacikistan, Rusiya və Özbəkistan musiqiçiləri tutub.

Festivalın münsiflər heyətinin üzvləri arasında Azərbaycan Milli Konservatoriyasının rektoru, Xalq artisti Siyavuş Kərimi də olub.

Xatırladırıq ki, musiqi bayramının açılışında Özbəkistan Prezidenti Şavkat Mirziyoyev, MDB İcraiyyə Komitəsinin sədri–icraçı katib Sergey Lebedev, Rusiya Prezidentinin mədəniyyət məsələləri üzrə müşaviri Vladimir Tolstoy, bir sıra ölkələrin mədəniyyət nazirləri və digər yüksək səviyyəli qonaqlar, Özbəkistan hökumətinin və parlamentinin üzvləri, səfirlər, habelə beynəlxalq təşkilatların nümayəndələri, elm, mədəniyyət və incəsənət xadimləri, jurnalistlər iştirak ediblər.