Nazir və müavinləri vətəndaşlarla görüşdü - Fotolar

Nazir və müavinləri vətəndaşlarla görüşdü -  Fotolar
3245 dəfə oxunub
  • A-
  • A
  • A+
İyunun 21-də Mədəniyyət naziri Əbülfəs Qarayev Balakən rayon Mədəniyyət Mərkəzində Balakən və Zaqatala rayonlarından olan vətəndaşları qəbul edib.

Axşam.az xəbər verir ki, mədəniyyət nazirinin birinci müavini Vaqif Əliyev Şəki şəhər Heydər Əliyev Mərkəzində Şəki və Oğuz rayonlarından, nazir müavini Rafiq Bayramov Qax rayon Heydər Əliyev Mərkəzində Qax rayonundan olan vətəndaşları qəbul ediblər.

Qəbullardan öncə ümummilli lider Heydər Əliyevin abidəsi ziyarət olunub, abidə önünə tər çiçək dəstələri düzülüb.
Nazir Əbülfəs Qarayevin iştirak etdiyi qəbulda vətəndaşlar tərəfindən Balakən rayonunda Tarix-diyarşünaslıq muzeyi üçün yeni binanın tikilməsi, Bakı Xoreoqrafiya Akademiyasının mütəxəssisləri tərəfindən ustad dərslərinin keçirilməsi, “Söz” ədəbi layihəsinin rayonda təşkili, Heydər Əliyev Mərkəzində tanınmış rəssamların əsərlərinin nümayişi, Mədəniyyət Mərkəzinin nəzdində fəaliyyət göstərən folklor qrupları üçün səhnə geyimlərinin verilməsi, mədəniyyət müəssisələrinə yeni ştatların verilməsi ilə bağlı müraciətlər edilib.

Zaqatala rayonundan olan vətəndaşların müraciətləri isə kitabxanalara gözdən əlillər üçün audiokitabların verilməsi, Aşağı Tala kəndi ərazisində məcburi köçkünlər üçün salınmış qəsəbədə yerləşən kitabxanaya yeni ştatların verilməsi, xalça sənətinin inkişafı üçün Heydər Əliyev Mərkəzinin lazımi avadanlıqlarla təchiz edilməsi və ustad dərslərinin keçirilməsi ilə bağlı olub. Görüşdə həmçinin Xalq teatrına dövlət teatrları tərəfindən ləvazimat və inventarların, Uşaq incəsənət məktəbinə musiqi alətlərinin verilməsi, fəxri adlar, işlə təmin olunma və digər məsələlərlə bağlı müraciətlər də səslənib.

Mədəniyyət Nazirliyinin aidiyyəti struktur bölmələri nümayəndələrinin iştirakı ilə keçirilən qəbullarda vətəndaşlar diqqətlə dinlənilib, qaldırılan məsələlərin böyük əksəriyyəti yerindəcə həll edilib, digər müraciətlərin operativ araşdırılması və qanunvericiliyə uyğun həlli üçün müvafiq tapşırıqlar verilib.

Qəbullarda ümumilikdə 50 nəfərdən artıq vətəndaşın müraciəti dinlənilib.